Patrimonio d'a Humanidat

Un puesto d'o Patrimonio d'a Humanidat ye un aria protechida legalment per una convención internacional administrada per a UNESCO. Os puestos d'o Patrimonio d'a Humanidat son designaus per a UNESCO per a suya importancia cultural, historica, cientifica u d'unatro tipo. Se considera que os puestos contienen patrimonio cultural y natural en tot o mundo considerau de valor excepcional pa la humanidat. Pa estar trigau, un Puesto d'o Patrimonio d'a Humanidat ha d'estar un fito unico que sía identificable cheografica y historicament y que tenga un significau cultural u fisico especial. Per eixemplo, os puestos d'o Patrimonio d'a Humanidat pueden estar ruinas antigas u estructuras historicas, edificios, ciudaz, desiertos, selvas, islas, lacos, molimentos, montanyas u arias montesinas. Un Puesto d'o Patrimonio d'a Humanidat puede significar un logro notable d'a humanidat y servir como evidencia d'a nuestra historia intelectual en o planeta, u puede estar un puesto de gran polideza natural. En chulio de 2021, existen un total de 1154 puestos d'o Patrimonio d'a Humanidat (897 culturals, 218 naturals y 39 mixtos) en 167 países. Con 58 arias trigadas, Italia ye o país con mas puestos en a lista.